EAEn arraroak diren espezieen ezohiko behaketen homologaziorako batzordea

EBOren barruan Behaketa Arraroen Batzordea izeneko lantaldea sortu zen 2017. urtean. Batzorde horren lana da urtean zehar EAEn ikusitako espezie arraroen behaketak jaso, aztertu eta homologatzea. Horretarako, EAEn ezohiko diren espezie eta subespezieen zerrenda bat osatu da, eta zerrenda horretan zehazten den espezieren bat ikusten bada EAEn, lantalde honek hartuko du behaketa hori aztertu eta homologatzeko ardura. Urte amaieran, homologatutako ezohiko behaketa guztien zerrenda argitaratuko du.

2026. urteaz geroztik, Batzorde honen ardura eta kudeaketa Aranzadi Zientzia Elkartearen Ornitologia Sailaren eskuetara igaro da. Batzordearen funtzionamenduak bere horretan jarraituko du, baina Aranzadi elkarteak kudeatuta.

Txostenak

• Informe sobre aves raras en Euskadi 2024 – Ezohiko behaketak 2024 (PDF)
• Informe sobre aves raras en Euskadi 2023 – Ezohiko behaketak 2023 (PDF)
• Informe sobre aves raras en Euskadi 2022 – Ezohiko behaketak 2022 (PDF)
• Informe sobre aves raras en Euskadi 2021 – Ezohiko behaketak 2021 (PDF)
• Informe sobre aves raras en Euskadi 2020 – Ezohiko behaketak 2020 (PDF)
• Informe sobre aves raras en Euskadi 2019 – Ezohiko behaketak 2019 (PDF)
• Informe sobre aves raras en Euskadi 2018 – Ezohiko behaketak 2018 (PDF)
• Informe sobre aves raras en Euskadi 2017 – Ezohiko behaketak 2017 (PDF)

Espezie arraroen behaketen homologazio-prozesua

Lantalde honek Euskal Autonomia Erkidegoan arraro diren espezieen zerrenda osatu du (beheko taulan duzu zerrenda). Gure lurraldean arraroa den espezieren bat ikusiz gero, behaketaren inguruko informazioa helbide honetara bidaltzea eskatzen dizugu, homologatua izan dadin: ornitologia@aranzadi.eus. Gainera, Batzordeak www.ornitho.eus eta ebird webguneak ere aztertzen ditu, bertan ager daitezkeen ezohiko behaketak biltzeko (han ere gehitu ditzakezu).

Behaketa Arraroen Batzordeak bere egiten ditu Guidlines of the Association of European Records and Rarities Committees (AERC) delakoak ezartzen dituen irizpideak. Ezohiko behaketa bat homologatzeko orduan, garrantzitsua izango da behatzaileak ematen dituen datuak, hala nola, egiten den deskripzioa eta eransten den dokumentazio grafikoa. Ahalik eta informazio zehatzena bidaltzea eskatzen dizugu, deskripzio xeheak eta material osagarria (argazki edo bideoak) gaineratuz.

Kideak

Espezie Arraroen Batzordeak 5 kide ditu, bozka eskubidearekin, eta administrazio lanak egiten dituen botorik gabeko idazkaria. Kide guztiak esperientzia handiko ornitologoak dira, hegaztien identifikazioan aditu eta gure lurraldea ondo ezagutzen dutenak. Gainera, penintsula mailako antzeko beste batzorde batzuetako kide ere badira eta urteetako esperientzia daukate. Hauek dira, une honetan, lantalde honetako kideak:

• Arizaga, Juan (Idazkaria)
• Belamendia, Gorka
• Calleja, David
• Salvador, Mikel
• Santamaría, David

Albisteak

• 2024. urtean Euskal Autonomia Erkidegoan behatutako txori-espezie arraroen txostena argitaratu dugu; 67 behaketa homologatu dira (2025eko urrian)
• 2021. urtean Euskal Autonomia Erkidegoan behatutako txori-espezie arraroen txostena argitaratu dugu; 62 behaketa homologatu dira (2022ko azaroan)
• 2019ko behaketa arraroen txostena argitaratu berri dugu (2020ko martxoan)
• 2018ko ezohiko behaketen txostena argitaratu dugu: “Informe de aves raras en Euskadi 2018” (2019ko apirilean)
• 2017an zehar Euskal Autonomia Erkidegoan izandako ezohiko behaketen txostena argitaratu da (2018ko azaroan)

EAEn arraro diren txori espezieen zerrenda

Euskal Autonomia Elkartean arraro bezala katalogatu diren espezieak ondorengoak dira; nahi baduzu, Euskadiko Hegaztien Zerrenda osoa ere kontsultatu dezakezu, non gure lurraldeko espezie guztiak zerrendatzen diren, euren kategoriarekin.

Azken urteotan izan diren behaketa kopuru handiarengatik, zenbait espezie zerrenda honetatik kanpo geratu dira: kaio kaspiarra (Larus cachinnans) 2018an, beltzarana (Plegadis falcinellus) eta enara ipurgorria (Cecropis daurica) 2019an, sai beltza (Aegypius monachus) eta istingor txikia (Lymnocriptes minimus) 2020an, elanio urdina (Elanus caeruleus) 2021ean, mandarin-ahatea (Aix galericulata) 2022an, sorbeltz arrea (Apus pallidus) eta itsas txirta (Anthus petrosus) 2023an eta gabai arre mediterraneoa (Calonectris diomedea) 2024an.

Bestalde, espezie berriak ere gehitu dira azkenaldian ezohiko hegaztien zerrenda honetara, Euskadin zuten estatusa aldatu ondoren: Puffinus yelkouan, Porphyrio porphyrio, Threskiornis aethiopicus eta Aegolius funereus 2019an, Gavia arctica 2020an, Aythya nyroca 2021ean, Motacilla flava cinereocapilla subespeziea 2022an, Cercotrichas galactotes 2023an, Bucanetes githagineus 2024an eta Cyanopica cooki eta Stercorarius maccormicki 2026an.

Euskadi mailan homologatzen diren espezie arraroak

Hemen duzue indarrean dagoen Euskadiko hegazti espezie arraroen zerrenda ofiziala. Asteriskoak (*) adierazten du subespezie bat dela. Informazio guztia jasotzeko, kontsultatu Euskadiko Hegaztien Zerrenda osoa.

Espainia mailan homologatzen diren espezie arraroak

Hemen duzue Espainia mailan homologatzen diren espezieen zerrenda ofiziala. Asteriskoak (*) adierazten du subespezie bat dela. Informazio guztia jasotzeko, kontsultatu Euskadiko Hegaztien Zerrenda osoa.